قصيدة لشيخ زجالي دكالة ” الغوتي المفتقير” بعنوان :الفال

الفال وقر و السكات من الغدر
و يا لطيف من الفعايل المدمومة
تصيد الحوت و الحوت في البحر
و لا تكسكس على رنب و رنب في الدومة
من قلب الحجر و الصخر
تنبت العشبة المعلومة
احلى ما كاين من الثمر
وخا بالشوك ملغومة
لي خوات شكارتو و ما هجر
يعيش عيشة مهمومة
في سوق البشر طيح ليه السومة
زمان كان بنادم لا تقهر يغرب القبر
و ما يخلي اللومة
ثاق في الوقت و الزهر عطاه بالدهر
و الحق ما فات الطريق المرسومة
طريق العمر
عل الخير و الشر مقسومة