قصيدة زجلية للاستاذة انصاف بلالي بعنوان :كنا وكنتو
كنا وكنتو صرنا وصرتو
حكمة قديمة طايحة فالوذن
ودبا جا الوقت تحكم بالعقل,
وتسكن القلب
حبك الساكن قلبي ،
الداوي جرحي،
المدفي قلبي
المشبع جشعي
صبح الطاعن قلبي،
سباب جرحي،
لكاوي قلبي،ا
لمعطش جشعي
نظرة من دك العيون الهايجة جمري، دك الخصر المالك شهوتي ،
داك البسم لواكل فرحتي
يامعشوقي …..
شوف من حالي
ماتفنينيش بلاوقتي
متدفنيش …..
وانا مازل نبضي
قصيدة للزجالة فتيحة بلالي بعنوان: بارود المعاني
مال الكلام المرصع بالحكمة ما بقى يعجب
مال السعد العاثر نغصتوا واشمة في القلب
جرحي زاد
ساكن ضلوعي
يفضفض بلسان
ناروا من حطب
ماتساوى الميزان
الجمر الحامي في الگاشوش
صروفو ما بغات تقاد
نحكيكم حكاية
حكاية فتيلة
شاعلة في القلب
حكاية السعد العاثر
بين ليلة عليا تقلب
نسرد حجابة
حجاية ام الغول
حضرات الخيل التبورد
في كل مكان
والجمر ناروا دخان
طلت طلة
مافيها امان
شافت الهم يرقص
والغبينة في العش ترفس
طلت طلة
وما دارت الحس
نحكيكم حكاية
حكاية ريا وسكينة
تقتل القتيلة
وتوقف تبكي وتنوح
ياك الشمس
ما يدرگها غربال
وياك خيوط المحبة
ماتعرف تخبال
شكون فينا
فهم الزمان مزيان
لا تركب سفينة المجهول
وتعيش نفسك في الاهوال
ما تغرك لحية
ما يغويبوك
اصحاب المال
النية المليحة
ما ترشي الحبال
سمع مني الكلام المعقول
المرصع من لسان العقال
نغمة اهل الحال
السواكن ونغام الهبال
ايام تنسات
محال واش تعاد
شكون فينا
جمر العطفة
في گلبوا مابان
شكون باق ما فهم
دوام الحال من المحال
بقلم : فتيحة بلالي
الجديدة اليوم